政情：女議員流年姻緣 容海恩見光死 麥美娟繼續等

容即使講錯嘢 都會被包容

楊師傅話，容海恩由四十歲起行庚戌運，正官同財運，財生官旺，職位上升，但戌係火庫，庚係正官，火庫燒住正官，正官係女人嘅桃花運，所以就算有桃花都好難成事。農曆七、八月遇到合心水對象睇落似層層咁，但都係曇花一現，水月鏡花，以為成事，其實係冇啲咁嘅事，因為佢火太旺，金見到火就會熔，即係桃花運見光死。

楊又話，容海恩係木命，但八字睇唔到水木，火好旺，好鍾意講嘢，講成點就要睇佢個運好唔好，但今年佢都幾好運，就算講錯嘢都好多人包容佢，其中農曆六、九月更加旺，就算開口夾着脷講錯嘢，人哋都會認為佢講得啱。

麥有助力 「幾乎死都講翻生」

至於麥美娟，八字係乙木命坐七殺，好學、勤力同孝順，今年戊戌財生殺旺，特別吃力，大運由四十八歲行到五十七歲辛已年，傷官制殺有助力，楊師傅形容佢幾乎死都講翻生，狗年以春天運氣比較好。不過，麥美娟嘅桃花運就比較反覆，農曆七、八月比較似樣，但真正姻緣就要到二○年先至成事。

講到陳淑莊，佢係水命，屬金嘅月份出世，金生水，佢會覺得自己有無窮嘅力量，好似做極都唔攰咁，而佢要行木火運，今年係土年，佢又唔忌土，所以會遇強愈強，對佢惡啲，佢又好惡咁對你，如對佢溫柔，佢就好好咁對你。佢今年行七殺運，有好獨特嘅吸引力，有政治魅力或女性某個階層嘅魅力，睇起上嚟特別順眼，做咩都較易成功，上半年特別有作為，容易受到認同，但立秋後就差少少，到農曆九月又會好出色。

姻緣方面，陳淑莊假姻緣居多，但佢今年特別有吸引力，如果有心搵番個好歸宿，農曆六、九月會衝得起，如果今年唔得，要再等行土運才會成功，即二○二一年，但其時行正官運，冇今年咁精彩，即係冇咁激情囉！其實風水命理同八字批算，目的都係想幫人趨吉避凶，信則有、不信則無，結果係點亦毋須過於介懷。