相隔半世紀再爭殊榮名宿教路撐陽光元朗
陽光元朗今季在盃賽為球迷帶來驚喜，「橙衫軍」出戰本屆高級銀牌賽，先後跟和富大埔及傑志激戰120分鐘後，分別以4比2及3比1淘汰兩支強隊，躋身周六的決賽。為了在場內場外作出最佳準備，這支地區球隊找來50年前帶領元朗奪得銀牌冠軍的陳鴻平及陳瑤琴兩位功臣，希望從他們身上偷師，相隔半世紀後再奪殊榮！
現為理文教練團成員之一的陳鴻平，是元朗於1967/68賽季的銀牌冠軍功臣，「平哥」回憶當年元朗原來是「雙料冠軍」︰「其實當年攞咗兩個冠軍，另一個係由聯賽前4名打嘅季後賽，我哋都贏埋。我本來踢緊愉園，但撞正香港暴動，好多隊波解散，愉園退出聯賽，我就轉投咗元朗。」當年25歲的「平哥」決賽憑一個間接自由球為元朗建功，球隊最終2比0贏東昇奪冠，事隔50年「平哥」記憶猶新︰「我見個龍門企得唔係咁好，一燙就入，記得喺龍門嘅右手邊角入。」
前足主陳瑤琴：當年獎金夠買屋
要數元朗昔日首奪銀牌的代表人物，除莫振華、周少雄及郭錦洪等球員外，當然少不了球圈中人尊稱「阿姐」的陳瑤琴，現年95歲的她曾先後跟丈夫趙不弱入主過元朗、流浪、加山及海蜂等球會，80年代淡出港甲。元朗今季再殺入銀牌決賽，同樣由女足主掌舵，但「阿姐」謙稱沒有甚麼可以提點現任足主郭靜然；對於當年涉足足壇後首個盃賽冠軍，「阿姐」印象最深竟是巨額獎金︰「我畀嘅獎金好重o架，佢哋（球員）拎去買屋o架！不過幾多就唔記得咗！」
陳鴻平亦傳授錦囊給葉子俊等一眾陽光元朗後輩︰「入得決賽兩隊實力差唔遠，最緊要有番幾吓板斧，隊波要齊心，就算係『四六波』，『四』都可以贏『六』，呢啲情況經常發生，英超會有，其實香港都一樣！如果體能或技術輸蝕，戰術都可以搭夠，咁就拉得平。」作為後輩的葉子俊同意之餘亦極度期待今仗︰「球隊自舊年12月後，表現開始回勇，攻守都有改善，對強隊亦冇輸波，加上自己係原居民身份，決賽對自己更有意義，希望大家走多步靠鬥志贏波！」
組「千人打氣團」為球員添動力
大戰當前，陽光元朗亦專程組織了「千人打氣團」，於周六決賽安排區內市民前往大球場為球隊助威，會長王威信表示，希望球迷的支持能化成球員場上奮鬥動力︰「希望能夠凝聚到社區力量之餘，亦期望畀到球員最大嘅支持，齊齊為元朗再創歷史！」
圖/文：何彥霆、余樂詩