政情：任亮憲復出參選 自比「前鋒」

范國威報名 撞正落雨

任亮憲尋日搵咗多名財金界人士撐場，問及佢曾出任中資公司嘅非執行董事，今次參選係咪想幫建制派「鎅走」民主派候選人嘅票？佢強調非執董嘅作用係監察公司運作，同立法會議員監察政府一樣，佢又借民協前立法會議員馮檢基嘅「中場論」，形容自己係踢前鋒，今次參選係認真想入波當選。

勝出民主派初選嘅新同盟前立法會議員范國威，昨早喺多名泛民成員陪同下到沙田政府合署，報名參加立法會新界東補選，但期間全程落雨，仲遇上政府合署舉行火警演習，過程頗為狼狽，佢就笑指自己無懼風雨。已報名參選港島區嘅有新民黨陳家珮同香港眾志周庭，參選新東嘅則有工聯會鄧家彪同獨立陳玉娥。