中環出更：醫療儀器捐大學被拒唐卓敏收藏夢碎

William話曾經想收藏一部上世紀七十年代出產嘅伽瑪射線掃描醫療機，部機係用真空管做膽，同依家用IC（集成電路）做好唔同。不過要收埋咁大部機梗係唔容易，William想捐畀大學但被拒絕，結果惟有拆晒佢，諗起都覺得好嘥喎。講開又講，啲醫療設備體積咁大，要搬上樓都好大陣仗，William就話，所以今次要申請封咗條彌敦道，拆晒啲窗，然後三更半夜運上樓。

林青最鍾意收藏珠寶手袋

William太太林青都喺度，佢自己係做幹細胞護膚品代理生意。老公咁多收藏，唔知佢有冇投訴呢？林青就笑住話冇，事關老公好企理，租咗兩個倉收埋佢啲收藏，屋企都有一間書房專擺佢啲寶貝。咁有冇受老公影響自己都收藏埋一份？佢就笑稱有，仲話最鍾意收藏嘅係珠寶同手袋添。

梁馮令儀（左）同梁智鴻（右）樂見專業醫療診斷中心成立。

高永文（左）講起一段搶租趣事，旁為香港放射科醫學院院長羅振基。

高永文操舊業畀老友搶租

有「放射科女王」之稱嘅香港放射科醫學院創院院長梁馮令儀（Lilian ）及老公梁智鴻、食物及衞生局前局長高永文、香港放射科醫學院院長羅振基等人都有去撐場。高永文話佢係以隔籬鄰舍身份出席，事關佢間骨科診所就喺樓下。佢仲講起一段趣事，話說大半年前佢決定離開政府重操舊業時，最先睇中呢一層，點知後來獲管理公司告知畀人全層租晒，原來係老友鬥搶舖，真係搞笑。

卓妮