中環出更：立會火警演習 毛孟靜「縮骨」走定先
立法會尋日中午舉行年度火警演習，以往議員需離開立法會綜合大樓疏散到添馬公園草地集合，但尋日因為天雨關係，就改往立法會示威區集合。不過喺火警演習之前，立法會議員毛孟靜竟然就已經現身示威區內等候喇。毛孟靜話，因為自己嘅議員辦公室喺大樓八樓，所以喺二樓開完會就索性直接落地下示威區等喎。雖然咁樣可以行少幾層樓梯，但火警鐘未響就走定先，咁就唔叫走火警啦，估唔到毛孟靜連走火警都要諗縮數偷懶！
除咗毛孟靜，偷懶嘅議員仲有陳克勤、莫乃光等，佢哋都話因為會議結束時間接近火警演習開始時間，所以提早去定示威區等。
葛珮帆最快順利逃生
唔計偷懶嘅幾位，今次演習最快順利「逃生」嘅係議員葛珮帆（EQ），EQ話自己啱啱喺二樓開完會，所以係由二樓出發。而最後一名抵達示威區嘅議員就係鄭松泰。鄭松泰話，自己喺二樓開完會後就返咗上十樓嘅辦公室，然後跟住指示由十樓出發行樓梯到示威區，樓層高、路程遠，所以就變成最後一個抵達喇。
鄭松泰又話，佢喺中學時代都有參與火警演習，但學校一般會喺午飯時間前舉行，建議立法會可以參考，方便議員演習過後隨即食晏喎。
卓妮