政情：盈餘爆燈 波叔晒命 議員鬧有錢唔識用

柯創盛：勿做守財奴 還富於民

波叔喺網誌話本財政年度首八個月嘅綜合盈餘為五百七十二億元，較原來全年盈餘預測嘅一百六十三億元高，預計本財政年度最終錄得嘅財政盈餘會相當高。佢仲為《基本法》第一百零七條有關公共財政須「量入為出」等條文解釋，指條文並非每年開支嘅「緊箍咒」，最重要係喺一段時間內保持大體上財政平衡，避免出現結構性赤字。

呢頭話唔係緊箍咒，即係可以使錢喇，點知嗰頭又舊調重彈，撳住個荷包。佢又話政府相當重視對整體社會長遠需要，要未雨綢繆作出投資，而唔係做啲可以獲得一時掌聲嘅短期措施，再加上香港係一個細小而開放嘅經濟體，稅基狹窄，政府收入易受環球經濟波動影響，故政府須保留相當實力的財政儲備，以備不時之需。

見波叔晒盈餘爆晒燈，建制派嘅議員都睇唔過眼，柯創盛叫波叔唔好做「守財奴」，要還富於民，舉例公屋免租、長者出雙糧、為弱勢社群提供支援等，講明叫政府要同市民共度時艱，分享經濟成果，應使則使咁話。工聯會陸頌雄仲提醒政府要履行「理財新哲學」，唔好過度保守，繼續喺安老、醫療、教育等多方面推出大刀闊斧政策，又建議學新加坡搞基金將儲備增值。

邵家臻指司長要大刀闊斧行事

社福界嘅議員邵家臻鬧爆政府做法過於保守，強調一次性撥款係解決唔到長久問題，舉例年年都叫政府將食物銀行恒常化，政府就撥一兩年錢做營運，「你唔嫌，我都悶喇」。佢形容波叔「好淆底」，做事過於謹慎，所有事都話唔關佢事，當政策局施政出爐就畀錢，作為司長唔應該咁謙卑，要大刀闊斧行事。會計界梁繼昌就話波叔論調同以往一樣，全年盈餘預測仲係非常保守，佢預計最尾埋數盈餘或會相當強勁，但估新一份預算案就唔會有乜嘢新政策，啲儲備就留嚟為基建項目超支「補鑊」。