政情：泛民初選難借實地票站 趙家賢賴被打壓
立法會四個議席空缺喺三月十一日進行補選，泛民嘅初選將會喺下星期日搞實體投票，兩個選區加埋有八個票站。不過民主派今次搞初選都搞到頭都大埋，民主動力召集人趙家賢尋日就透露，話搵場地時遇到好大困難，稱有啲場地主管願意借出地方，但礙於佢哋嘅上司同埋各方壓力下，最終都係借唔到心儀嘅場地。
公布八票站位置
實體票站嘅位置，喺九龍西選區就包括基督教協進會大樓地窖、石硤尾村展覽廳同埋黃埔港鐵站；而新界東就有中大鄭裕彤樓、將軍澳港鐵站、大圍港鐵站、粉嶺港鐵站同埋大埔墟街市及熟食中心旁邊空地。由於部分係室外場地，趙家賢就透露已經向警方以「選舉集會」形式申請不反對通知書，當中有部分將會喺今日獲批。
至於投票方面，年滿十八歲而又係當區居民就可以參與，仲需要帶備喺一七年內發出嘅住址證明文件，或者係由政府發出嘅一六年嘅立法會選舉投票卡。
趙家賢話如果參與投票嘅人士投多過一次，只會計算第一次所投嘅票，預計每個票站至少有一千人投票。