中環出更：離開熱廚房 許曉暉瘦咗？
喺政府做嘢一向難啃，所以先有「熱廚房」嘅稱號。入得熱廚房，理論上都會因為工作忙同埋壓力嘅關係，唔使點減肥都會瘦。不過，民政事務局前副局長許曉暉（Florence）就透露，離開熱廚房後唔少朋友覺得佢瘦咗喎。咁奇？
多咗時間運動陪家人
Florence自從喺舊年年中離開熱廚房後，鮮有喺公開場合露面。尋日佢就應邀出席政黨活動，見佢依家瘦咗之餘，仲容光煥發咗添！問佢有乜減肥招數？佢話以往喺政府工作時其實都有做運動，但因為工作忙就做得比較少，離開政府後就多咗時間做運動，依家會做吓瑜伽、行吓山、同埋打吓羽毛球咁，所以自己都感覺成個人結實咗。
除咗做運動，佢仲會陪吓屋企人，幫吓囡囡溫功課咁，得閒佢仲會應學校同社企嘅邀請，做吓講座嘉賓，講吓歷史同埋文化嘢等等，聽落好似仲忙過以前喎。不過佢就話依家啲時間比較易控制，因為主要都係講座同埋去吓飯局，但以前就多啲工作，連星期六日都要開會。至於會唔會去旅行，佢透露，依家多數都會留喺香港，發掘吓啲比較少去嘅地方，早排就去咗大澳沙螺灣，遲啲可能會帶埋小朋友去沙頭角行吓添！
卓妮