政情：逃避罪責施壓戴耀廷罵法律界「鵪鶉」

佔中案上庭在即出口術

戴耀廷為咗「走數」拒絕承擔公民抗命嘅法律責任，無所不用其極，一時話「公民抗命」同「任意違法」有別，一時又話承擔責任不等於要認罪，被外界狠批歪理連篇。隨住佢同另外八名佔中搞手被起訴嘅案件將於明年一月九日進行審前覆核，戴耀廷又再嚟料，今次更出口術，要求法律界撐佢。佢話中央近年透過法律層面推展威權統治，釋法就係明顯例子，又話香港市民唔熟法律都算，但係法律專業界別中，包括資深大律師、法官等都唔夠膽出聲反抗，形容對方係「鵪鶉」。

鬧完一大輪，戴耀廷終於入正題，承認佔中未能爭取普選，現階段要守護同積聚力量，包括支持被起訴嘅抗爭者，講白啲，咪即係叫人支持自己囉。唔單止咁，佢仲話嚟緊自己同其他佔中搞手嘅案件就開始，「睇吓到時法律界頂唔頂得住」，言下之意，即係唔撐佢嘅人就係「鵪鶉」。另外，戴耀廷又提到民主派要建立一個聯盟，喺二○一九年區議會換屆選舉進行初選，要求市民即使心儀嘅候選人喺初選輸咗，點都要投初選勝出嘅人，咁即係預告佢到時會再搞類似「雷動」嘅計劃，又想再操控選票喇。

被斥挑撥離間從中獲利

對於戴耀廷再發表歪理，時事評論員陳雲生批評有關說法如同向法律界施壓，質疑戴耀廷目的係為咗逃避法律制裁。陳雲生又指，戴耀廷將中央同法律界放喺對立面，又用上「鵪鶉」等侮辱字眼，係想從中挑撥兩者關係，質疑對方想從中獲利。

戴耀廷搞咁多小動作，或反映佢心底明白自己罪成機會甚高，故用各種藉口同手法意圖擾亂視線。反而因為反對新界東北發展案入獄、目前獲保釋等候上訴嘅社民連黃浩銘就非常心水清，出席同一場合時，指住戴耀廷話「我係監躉，呢個人（戴耀廷）好快都係」，似乎連非建制派嘅盟友都認同戴耀廷係難逃法網。