政情：勸保育瀕危禾花雀 林超英：壯陽嚟做咩
俗稱禾花雀嘅黃胸鵐月初被列為「極度瀕危」物種，環境運動委員會主席林超英尋日喺宣傳保育禾花雀嘅活動上就話，細個嘅時候都有食過禾花雀，但就覺得味道一般、冇肉。對於有唔少人相信食禾花雀可以壯陽，林超英聽完之後就話，呢個世界好多嘢都可以壯陽，佢反問︰「壯陽嚟做咩啫？」睇嚟林超英冇呢個需要喇。
自爆童年食過
林超英話，五、六十年代香港好多燒臘舖都有得賣禾花雀，佢細個時爸爸都買過禾花雀返嚟畀佢食。不過佢就覺得禾花雀「冇肉，淨係脆卜卜」，味道都係一般。佢又提醒大家想身體好，最緊要都係均衡飲食，亂食禾花雀未必補到身，仲可能染上病毒。
觀鳥四十幾年嘅林超英大呻近年都無緣見到禾花雀，對禾花雀瀕臨絕種覺得好可惜︰「好慘，因為人類而無咗（禾花雀）係有違自然！」至於點解咁鍾意觀鳥，佢就話原本嘅興趣係天文氣象，但係當興趣變咗做職業，就好似無咗個興趣咁，所以就觀鳥補番數喎。