中環出更：立會極速換上《議事規則》新版本
建制派趁六名民主派議員喪失資格，急急提出修改立法會《議事規則》，經過一輪大戰後，終於喺上星期通過，而政府尋日就刊登憲報，並即時生效。立法會秘書處將會更換《議事規則》及《內務守則》，尋日亦率先有會議室更換晒最新版本，連議員蔣麗芸（阿Ann）都笑笑口豎起拇指畀個「讚」。
網站同App都已更新
尋日朝早就有公務員及資助機構員工事務委員會會議，而開會嘅會議室亦率先換晒最新版本嘅《議事規則》及《內務守則》。新版本嘅封面就冇變，但係睇番內文，就喺更新咗嘅規例旁邊，會印上「（2017年第187號法律公告）」、或「（2017年第186號法律公告）」。唔止會議廳，連立法會網站同流動應用程式都更換埋最新版本。
至於立法會議員方面，秘書處將會喺下周三向每位議員送兩套活頁合併版嘅《議事規則》及《內務守則》，但就要班議員保留原本《議事規則》及《內務守則》嘅硬皮封面、黃色間隔頁同金屬鉚釘，用嚟釘裝最新版本嘅《議事規則》及《內務守則》。
卓妮