中環出更:創科時代來臨會計師行做埋網絡安全

潮流興創新,早前有大會計師行宣布接受以虛擬貨幣比特幣(Bitcoin)支付其諮詢服務,可預見顛覆傳統嘅嘢將陸續有來。香港浙江省同鄉會聯合會(浙聯)及上海總會青委早前就舉行咗一場講座晚宴,一班後生仔齊齊探討創業及創新心得,中華總商會青年委員會副主席羅頌宜(Bella)都有出席。年幾前離開家族公司加入四大會計師行嘅Bella話,隨住創新科技時代來臨,會計師行都已經唔止做傳統業務,仲做埋網絡安全等,而佢就負責創新科技嘅業務。

Bella係「中國罐王」、中華廠商聯合會名譽會長羅富昌個女,佢年幾前離開家族公司加入四大會計師行,不過佢就唔係會計師。Bella話,隨住創新科技時代來臨,會計師行已經唔止做傳統稅務及核數業務,仲做埋網絡安全、教育及初創企業諮詢等,佢未入呢間公司之前都唔知添。現時佢就負責創新科技業務,包括喺內地建立創新中心平台。

講座晚宴分享創業心得

同場仲有本身係酒店太子女嘅浙聯青委主席王淑慈(Sukey),佢除咗要幫手打理酒店之外,佢同老公仲喺香港開咗三間日本餐廳,佢嘅創業心得就係凡事親力親為。Sukey亦係中總會董兼青委常委,所以當晚除咗浙江幫之外,仲有好多中總青委好友去趁熱鬧,包括主席黃楚恒及太太黃陳嘉妮等人。黃楚恒接手有八十幾年歷史嘅家族藥業生意,淨係省靚招牌都忙到冇時停,無暇去諗自己創業。佢話現時主要係睇實公司嘅管理及產品質素,多啲去攞香港名牌、Q嘜等認證。

上海總會青年組主任委員車弘健、浙聯青委會副主席柯琼浩、秘書長王俊傑同浙江旅港青年會會長丁心怡等人都有到場。柯琼浩及王俊傑相識於浙聯,當晚咁啱就係兩人結婚一周年,一班手足加插慶祝環節,倍添溫馨。

卓妮

第一手消息請下載on.cc東網iPhone/iPad/Android/Windows Phone Apps