政情：今日你上鏡：象哥潮戴古董玳瑁眼鏡

時下年輕人鍾意戴膠框眼鏡扮吓文青，玳瑁色嘅膠框眼鏡更喺近年盛行，冇諗過已經六十八歲嘅立法會進出口界議員黃定光（象哥）亦換咗新Look，潮戴「膠框眼鏡」。不過，象哥就話佢所戴嘅並唔係膠框眼鏡，而係古董玳瑁眼鏡。

象哥話副古董玳瑁眼鏡係朋友留畀佢嘅，佢只係換咗方便老花都可以睇文件嘅漸進鏡片。至於古董眼鏡係咪價值不菲，佢就笑笑口話自己曾經喺店舖見過一副半玳瑁眼鏡，即係只有眼鏡框係玳瑁，眼鏡臂係膠製嘅都要「幾皮嘢（數萬元）」。

平時立法會開會總係令唔少議員感到疲累，甚至會打瞌睡，唔知象哥戴咗呢副至少「幾皮嘢」嘅眼鏡之後，會唔會打醒十二分精神嚟開會呢？