繼高鐵超支嚴重搞到要「封頂」之後，有立法會議員尋日估計沙中線至少超支達一百卅億元，仲建議將來立法會審批超支撥款申請時，應加上「封頂協議」，務求將超支額限制喺二百億元內，以免沙中線淪為「千億鐵路」。話時話，沙中線嘅工程完成咗近八成，正所謂洗濕咗個頭，唔想沙中線變廢鐵，運輸及房屋局局長陳帆既要同港鐵拗數，又要去立法會攞錢，唔知佢有冇牙力拗得掂？
