政情：鄒秉恬倡沙灘「限奶令」 康文署：冇權禁制
沙灘都要「限奶令」？荃灣區議會會議尋日討論由議員鄒秉恬提出嘅動議，要求康樂及文化事務署配合荃灣區議會，日後合辦沙灘清潔活動時，應暫時禁止穿着性感泳裝嘅男女市民進入沙灘，以免影響學童嘅長遠心智成長。但康文署荃灣區康樂事務經理鄭國權回應指，康文署冇權力限制市民進入沙灘嘅泳裝同衣着款式，以免造成爭拗。
想曲線諷區會思想封閉
鄒秉恬喺會議上話自己係「曲線」諷刺區議會思想封閉，指早前區議會舉行清潔沙灘活動，一眾主禮嘉賓向沙灘市民派發紀念品同合照，惟大會攝影師卻拒絕為一名穿着比堅尼女士拍照，該名女士最後投訴大會歧視。
佢又喺會上展示當日嘅其他合照，並斥「比堅尼就唔影，大隻男着T-back又影？」佢認為性感同猥瑣嘅分別每個人都有唔同睇法，而區議會應持開放態度，又話事件「好離譜，完全接受唔到」，強調將事件放上區議會討論係希望作出檢討，亦希望保障區議會名聲。
早前曾與鄒就事件激辯嘅區議員羅少傑認為，鄒將事件放上區議會只係「唔忿氣」，又指當日鄒邀請穿比堅尼女士合照，但遭大會攝影師拒絕，「覺得唔開心，冇人尊重」，所以先提出議案。議案最後記錄在案，不須投票。