政情：陳家珮忙湊仔 似返兩份工
南區區議員陳家珮（Judy）於年初升呢做媽媽，目前囝囝未夠一歲，仲有敏感症狀要四出求醫，難怪佢大嘆湊小朋友好忙，猶如返緊兩份工。
打算請父母幫手照顧
Judy話，囝囝自兩個月大已經出現敏感，早排又因為食魚導致身體多處出現紅點，搞到半夜每兩個鐘痕醒一次，佢都冇覺好瞓，要幫手搽藥膏再氹個仔瞓覺，真係聽見都辛苦。Judy仲話，除咗睇西醫外，佢亦聽其他家長介紹，帶囝囝睇脊醫同接受自然療法，但佢個人相信科學，所以目前就主要睇西醫同脊醫喇。
Judy所屬嘅新民黨將為明年三月舉行嘅立法會補選舉行黨內初選，Judy承認都報咗名，睇嚟將來工作只會愈嚟愈忙。佢預咗畀囝囝嘅時間會減少，所以已打算請父母幫手照顧，咁佢就可以放心做嘢嘞！