政情：撐未來女婿 梁福元冒雨睇賽車
進行戶外活動最怕遇上落雨，十八鄉鄉事委員會主席梁福元早前特登去澳門睇賽車，都要冒雨睇，點解咁有心？原來係要支持未來女婿出賽喎！
梁福元話，當日比賽中途有意外發生，令賽事被腰斬，結果未來女婿喺十幾架車中排第七，成績都算唔錯。不過佢都謙虛咁話未來女婿仲要繼續努力。
自爆後生鍾意揸跑車
未來女婿作為賽車手，相信手車都幾辣，唔知梁福元夠唔夠膽坐呢？佢就似乎完全唔驚，仲大爆自己後生時都鍾意揸跑車喎！
不過，賽車比賽時不時有意外發生，相信家人少不免會提心吊膽。梁福元就話，未來女婿玩嘅係房車，架車有晒防撞架作保護，比電單車安全得多，所以冇咁驚。