政情：泛民 建制怪招鬥茅招 搞着梁君彥
立法會議員宣誓風波令民主派六人被取消立法會議員資格，建制派隨即計劃修改立法會《議事規則》，杜絕民主派拉布。之不過「你有張良計，我有過牆梯」，民主派除咗打尖提交修訂《議事規則》外，亦連月出「怪招」對抗，最新就有提出包括譴責立法會主席梁君彥在內嘅十七項動議。建制派亦非省油的燈，議員陳克勤就代表建制派出「茅招」，根據《議事規則》第九十一條，動議暫停執行大會各類事項處理次序嘅議案。此招一出，意味住可由梁君彥任意決定大會處理事項嘅次序，民主派出幾多怪招都會作廢。
泛民提17議案圖拖延時間
民主派為對抗建制派修改《議事規則》可以話係無所不用其極，繼上月打尖就《議事規則》提出十九項修訂後，議員朱凱廸就喺立法會審議有關銀行業嘅政府法案時，提出不中止待續議案拉布；之後又喺討論政府高鐵一地兩檢無法律約束力議案時，首次動用《議事規則》第八十八（一）條，要求傳媒及公眾人士離場，惹來外界強烈批評。前日佢哋再度出招，提出十七項議案，企圖拖延時間，阻止建制派改《議事規則》，當中部分議案更係第一次運用《基本法》第七十三條提出。
陳克勤以「審議次序」阻拉布
另一邊廂，陳克勤早前去信梁君彥，提出根據《議事規則》第九十一條動議暫停執行《議事規則》第十八（一）條、即大會處理各類事項次序嘅議案。呢招「茅」在議案一旦通過，梁君彥想大會審議乜嘢先都得，只要政府唔提交法案及議案，修改《議事規則》就永遠排先，民主派想拉布到明年三月立法會補選都難。
不過，陳克勤就唔認為建制派係出茅招。佢聲稱自從朱凱廸動議趕記者離場，民主派已擺明係開戰，所以佢哋建制派都只係「買保險」。又話如果民主派應承唔喺大會玩嘢，佢哋隨時都可以撤回有關第九十一條嘅動議。不過民主派依家玩到癲咗，又譴責議員，又傳召官員，佢哋當然都唔會撤回。
陳克勤又強調，建制派並冇阻礙政府法案同議案，佢喺畀梁君彥嘅信中講到明，如政府提交法案同議案，都係會傾咗政府嗰啲先，只係議員提出嘅議案先排喺修改《議事規則》嘅審議之後，加上不論係民主派定係建制派就《議事規則》提出修訂，都係一併討論，直情係「好公道」添。
不過講到尾，就算建制派出茅招對抗民主派拉布，最後都係要由身為主席嘅梁君彥去決定點做，等於將個燙手山芋拋畀梁君彥。民主派同建制派呢場大鬥法，睇怕最頭痕嘅都係梁君彥喇。