中環出更：Facebook初哥陳家強自嘲玩「老人科技」
城市人工作繁忙，自然少做運動，尋日一班政商界名人齊齊參與慈善組織小母牛嘅競跑活動，包括財經事務及庫務局前局長陳家強，佢仲同現任發展局局長黃偉綸、立法會議員林健鋒、政制及內地事務局前局長譚志源，以及機管局前行政總裁許漢忠組隊添，結果原定一公里嘅賽事，佢哋跑咗七百米就「投降」，但總算叫做成功衝線。
陳家強入咗熱廚房足足十年，早前重返科大執教鞭，啲同學仔或教職員有冇改唔到口繼續叫佢做局長呢？佢笑言可能喺出任局長期間，好多人仍然係叫佢做教授，所以啲人唔需要特別改口喎。佢又話依家多咗好多私人時間，近期開始愛上玩社交平台Facebook。佢喺熱廚房期間，帳號唔係自己打理，依家「無官一身輕」，不論係出席活動抑或係遊山玩水，統統都會放上網同好友分享。
但佢自認「好Out（過時）」，皆因佢相對活躍嘅Facebook網友都係上咗年紀嘅朋友，年輕人例如佢教嘅大學生其實已經唔玩，佢更自嘲係玩緊「老人科技」。不過，佢有一項興趣就係高爾夫球，早前仲專登飛咗去南韓釜山嘅高爾夫球場玩添！
咪以為打高球運動量唔大，林健鋒話佢打高球時要跟住個波走，又要左右量度位置，閒閒地都會行一萬步，換算番距離，即係等於七公里，消耗絕對唔細，所以今次競跑係「濕濕碎」。之但係另一隊友譚志源喺起步前得悉真係要跑動時，竟反問「我以為係散步咋」，惹得全場爆笑。
郭詩慧教小朋友手繪
另外，同場嘅香港化粧品同業協會會長郭詩慧亦喺小攤檔內，幫一班小朋友做手繪。佢話自己非常重視家庭之間嘅親子活動，每個星期都會同老公及囝囝去做戶外活動，例如踩單車咁。
卓妮