中環出更：莫乃光畏高 「跣」落山褲穿窿
山系旅行興起，去旅行唔再只係去著名景點或者購物「血拼」，唔少人都會特登去外國行山，感受外國自然美景。立法會資訊科技界（IT）議員莫乃光（Charles）早前就同屋企人去日本名古屋等地旅行，期間仲去咗屬於越前加賀國定公園嘅東尋坊。Charles就話，雖然自己有少少畏高同平衡力唔太好，不過都鍾意行山，仲自爆試過行山行到褲穿窿，好鬼尷尬喎。
去日本行「自殺懸崖」
Charles早排去咗日本行山，分別係東尋坊同立山黑部。佢話因為好多人喺東尋坊跳崖自殺，所以嗰度有「自殺懸崖」之稱，不過有賴IT發展，喺嗰度自殺嘅個案已大幅減少。乜嘢科技可以防止自殺咁勁？佢就話其實因為多咗人去嗰度玩手機遊戲「Pokémon GO」，結果啲原本想自殺嘅人去到嗰度都冇心情做傻事嘞！
其實佢平時喺香港都有行山，佢憶述有次行出名高難度嘅蚺蛇尖，落山時因為山路太斜，本來有啲畏高嘅佢就要「五點」投地咁行，即手腳連臀部並用「跣」落山，結果搞到條褲都爛埋。不過佢一於冇有怕，仲話遲啲得閒要挑戰日本富士山咁話。
卓妮