中環出更：陳鑑光畀膽年輕人沖上雲霄
仁愛堂早前舉行名人名曲慈善演唱會，為旗下蔡黃玲玲教育基金籌款。仁愛堂副主席陳鑑光（Charles）同做過仁愛堂主席嘅太太陳鄭玉而都有到場，講起近期接連有香港年輕學員喺外國學揸飛機時遇上意外身亡，Charles身兼香港航空青年團榮譽中校，一直鼓勵年輕人沖上雲霄，佢自己又學過揸飛機，問起事件會唔會嚇窒年輕人嘅飛天夢時，佢話唔使驚。
Charles話好多朋友都問佢揸飛機係咪好危險？其實駕駛飛機係一件非常安全嘅事，通常遇上突發情況，都仲有幾分鐘時間可以修正錯誤，認為事件係好個別嘅意外。至於佢早幾年喺加拿大學駕駛飛機，但一直未攞到牌照，如果要考牌就要重新再學過嘞！
當晚活動係以「古巴之夜」為主題，仁愛堂主席李愛平同前主席蔡黃玲玲都着上熱情奔放嘅連身花裙現身，現場仲有節拍輕快嘅非洲鼓伴奏，令人彷彿置身南美島國。
蔡金山上台獻唱籌款
李愛平話今年幾間名牌時裝店都流行古巴衫，所以唔使大費周章去搵。蔡黃玲玲丈夫蔡金山亦着到襯晒晚宴主題，佢笑稱件衫係喺屋企衣櫃摷番出來，唔使特別花心思，當晚佢仲上台獻唱籌款，玩得好盡興。
蔡黃玲玲就話教育基金多年來資助唔少優質教育項目，包括名師出高徒計劃，亦連續七年贊助極地之旅嘅環保教育活動。佢話目的係畀年輕人到世界各國去睇睇，藉此培養正確家國觀念同社會責任。
卓妮