中環出更：酒牌局前成員 黃傑龍小酌即紅
香港日本食品及料理業協會早前舉行成立一周年會慶，卓妮一入場就見到主席黃傑龍（Simon）飲到塊面紅晒，Simon自嘲酒量一般，當日只係飲咗一支多啲啤酒就變成咁。講起飲酒，曾為酒牌局成員嘅佢自爆入咗局之後先至識飲酒，仲買咗人生第一支威士忌添！
酒牌局成員係要審批酒牌嘅申請，乜要飲酒嘅咩？Simon笑稱係有一次酒牌局成員出訪，回程途經免稅店時，佢請教一位好友買咩酒好，呢位高人就指點佢買威士忌，於是Simon就咁買咗人生第一支酒喇！佢仲被朋友嘲笑，話好彩佢唔係加入禁毒常務委員會，如果唔係佢咪會試毒品？真係搞笑。
黃偉鴻開日式零食店行清雅風
同場仲有飲食界立法會議員張宇人、香港餐飲聯業協會主席李遠康、會董寇鴻萍等人，日本農林水產省食料產業局局長井上宏司、日本駐香港大使兼總領事松田邦紀等日方代表亦踴躍出席，佢哋力推日本食材，話希望香港中菜館多多利用日本食材煮中餐咁話。
中華廠商聯合會食品製造業委員會主席黃偉鴻（Ellis）都有到場，佢啱啱開咗一間自家品牌日式零食店，店內唔再係陳列包裝五顏六色、令人眼花繚亂嘅各式零食，取而代之嘅係另一種清雅風格，結果店舖開咗冇耐，就吸引一間來自台灣嘅高檔書店注意，主動邀請佢喺港島新分店內開舖。Ellis勁興奮，因為呢間書店係文化及品味嘅象徵，佢度橋出嚟嘅零食店新概念得到認同，當然覺得開心啦。
卓妮