政情：徐英偉「升呢」 仲未搣甩民政局
擔任咗兩屆政府民政事務局局長政治助理嘅徐英偉(Caspar)，喺新一屆政府已經「升呢」為勞工及福利局副局長，不過可能喺民政局做得耐，唔少議員講起佢，就自然諗到民政局。難怪Caspar話，返咗新工之後，落立法會仍然會被議員叫咗去討論民政事務嘅嘢啦。
Caspar就話，之前立法會議員蔣麗芸見到佢，就話有啲康樂議題要搵佢傾，搞到佢好尷尬，惟有婉轉地講番自己轉咗政策局喇，不過會代為轉達意見。其實，立法會復會後，Caspar一如既往頻頻落立法會同議員見面，同以前做政助時冇乜分別。難怪有議員笑佢，升咗職、加咗人工，但就繼續做番政助時嘅工作。
化萬聖節妝出席活動
臨近萬聖節，Caspar尋日出席活動時就化咗個妝應節。佢又話，後生時試過扮個名同自己英文名相似嘅卡通角色，仲專登染白個頭同整白塊面，諗住行得意路線，點知後來流汗搞到個妝溶咗，變成驚嚇效果，自此之後佢就好少化濃妝喇。