政情：冧友掌權無甩轆 建制又爆退會潮

梁美芬退六個事務委員會

建制派早前「冧友」加入十八個事務委員會，除咗確保喺大部分事務委員會取得主導權，嚴防民主派突襲推翻早前協調事務委員會正副主席人選，結果無意料之外嘅事情發生，建制派達成任務後由前日開始，一批議員陸續退出委員會，其中早前加入十二個事務委員會嘅獨立議員梁美芬，連退包括民政、房屋、福利、工商事務等六個委員會成員。

身兼行會成員嘅建制派多名立法會議員，由於每逢周二早上都要出席行會，亦趁今次機會退會「減磅」，其中民建聯張國鈞退出最多四個委員會，緊隨其後係工聯會黃國健退出三個委員會，另外新民黨葉劉淑儀同新界鄉議局主席劉業強則分別退出兩個及一個委員會，而事有湊巧，張國鈞、黃國健同葉劉不約而同齊齊退出食物安全及環境衞生事務委員會，究竟係佢哋三人事前有溝通抑或咁啱得咁蹺，相信答案不言而喻。

另一方面，最近多次因推出「主席指示」同民主派駁火嘅財務委員會主席、保險界議員陳健波，可能預料未來工作會更困身，因此以重新安排議會工作為由，已去信工商及教育事務委員會主席要求退出嗰兩個委員會。

由此觀之，建制派退會潮相信只係一個開始，預料建制派內各板塊評估各委員會嘅最新形勢後，喺確保唔會「甩轆」嘅情況下，就會靜悄悄再退出個別委員會，但值得一提嘅係，自決派朱凱廸目前係唯一一名議員，全數加入十八個事務委員會，有人估計，除非朱凱廸識得分身之術，否則頂唔住加入退會嘅行列，相信只係時間嘅問題。