中環出更：陳健波企硬反拉布 拒收番「主席指示」

鬧泛民「做大龍鳳就咪搞我」

陳健波尋日除咗表明唔會收番「主席指示」外，亦話唔會就「主席指示」召開特別會議討論。佢解釋已盡力同議員溝通，但未有清晰回應，仲話泛民主派早前會議上嘅觀點冇新意同冇實質理據。佢又話聽日會議唔會再畀民主派討論「主席指示」，仲話財委會係畀議員審批財務建議，唔係抗議對主席嘅不滿，又話若果議員利用會議「有心做大龍鳳」，「就千祈唔好搞我喇，因為我真係好多正經嘢要做」，時間應花喺有建設性嘅事情上。

另外，議事規則委員會主席謝偉俊話一定會就議事規則委員會嘅會議「開快車」，而目前已訂下月六日同七日各召開四小時嘅會議，以加快處理議員提出嘅修訂案。被問及日前有議員網上直播委員會閉門會議嘅情況，佢話正研究公然唔尊重議會程序嘅行為，若研究認為當中涉及刑事成分，或會報警處理，但佢強調未有任何結論同想法。

卓妮