政情：蔣麗芸奇想：公眾街市增健身中心
立法會人事編制小組尋日討論喺食物環境衞生署開設一個為期五年嘅首長級丙級政務官職位，負責推動就公眾街市設施同管理作全面檢討、制訂策略，並監督落實有關改善措施，而議員蔣麗芸（Ann）認為新增嘅職位較為專業，建議政府考慮喺內部調升，避免出現「Hea足五年」嘅情況，跟住佢又建議政府考慮區內市民嘅需求，以大眾化價錢，增加健身中心。佢呢個奇想，就連政府當局都認為新穎呀！
冷氣裝得慢 商販呻侷促
其實唔少議員都關注街市安裝冷氣嘅問題，有泛民議員指有部分大圍街市嘅商販話喺夏天街市嘅氣溫高達攝氏四十度，令商販同埋市民都感侷促，甚至出現「熱死魚、熱死雞」嘅情況，佢批評政府點解喺一九年先完成工程。食物及衞生局首席助理秘書長黃淑嫻回應話現時大圍街市已裝上冷風機同抽風系統，而街市嘅室溫並冇四十度。當被質疑有冇去過街市了解實質情況時，黃淑嫻話有去了解，並指大圍街市嘅雞檔有「西斜」嘅情況出現。
另一泛民議員梁耀忠就話喺部分街市內，冷氣嘅開關時間不一，或會出現冷氣費比租金更貴嘅情況，而黃淑嫻則重申，街市冷氣收費係用者自付，而安裝冷氣成本係由政府負責。