政情：甘文鋒懶溫書 棄續體操裁判牌

甘文鋒話，每次續裁判牌都要考試，而考官都係專程由外國飛嚟香港嘅。考牌雖然唔使自己親身去示範體操，但溫書材料都一大疊咁厚，要花好多時間溫習。但係依家工作實在太忙，好難兼顧，所以惟有作出取捨。

無意參加補選 讓路黨友

早前有指甘文鋒所屬嘅新民黨擬為三月舉行嘅立法會補選搞黨內初選。甘文鋒講到自己咁忙，唔通佢有意參加補選？甘文鋒就話，如果要搞黨內初選就真係愈快愈好，因為候選人都要準備，不過佢自己就唔會參選喇。點解？佢話新民黨喺港島有幾個區議員，相信佢哋都有興趣參加補選，既然有黨友出戰，就唔使佢喇喎！