政情:小麗補選讓路 除笨有精

立法會四區補選將於明年三月十一日舉行,其中九龍西地區補選,大部分民主派都同意由被取消議席(DQ)嘅劉小麗出選,但其後另一DQ議員青年新政(青政)游蕙禎放話,強調該議席本來係屬於佢嘅,若青政決定派人參選,其他民主派應該讓路。小麗近日又透過傳媒放風回應,話如果青政真係派人參選,佢願意放棄參與第一輪補選。不過有分析指,小麗忽然表現得咁禮讓,可能另有盤算。

首輪料大混戰互鎅票 次輪勝算高

有說青政已覓得合適人選出戰九龍西補選,但其實除咗游蕙禎同梁頌恆,青政已經冇咩高知名度嘅人選。若改為支持黨外人士出選,其他民主派又會唔會「認數」讓路呢?再者部分溫和民主派,根本唔當支持港獨嘅青政係同路人,即使小麗肯讓路,溫和民主派亦未必跟隨。若然首輪九龍西補選同時有一名溫和民主派及一名低知名度嘅本土派人士參選,互相鎅票,代表建制派嘅民建聯深水埗區議員鄭泳舜就勝算大增。

如果鄭泳舜最後勝出補選,喺首輪補選中落敗嘅民主派及本土派候選人,亦唔會有顏面再次參選,加上建制派喺第二輪補選派出嘅人選肯定較弱,若小麗以退為進選擇第二輪先出戰,可謂除笨有精。不過,講到政治倫理,亦根本唔到小麗選擇,皆因佢自己個議席未進行補選,如果打橫嚟夾硬搶青政個議席,相信都會無好結果。

新東泛民本土互鬥 益咗建制派

同樣情況現已喺新界東地區補選出現,同青政關係密切嘅本土民主前線,已表態支持「立言香港」召集人張秀賢出戰。不過,其他民主派並唔認可張秀賢有優先參選權,兩名前立法會議員,新民主同盟范國威及前民主黨鄭家富,均已表明無論如何都會參選,最後可能益咗身兼工聯會與民建聯成員嘅鄧家彪。長毛一早表明會等埋佢單DQ案司法覆核完結後,先至參選第二輪嘅新界東補選,絕對係有先見之明,唔會令人覺得佢反反覆覆。

第一手消息請下載on.cc東網iPhone/iPad/Android/Windows Phone Apps