政情：郭卓堅宣布移民 拒交代眾籌善款
「長洲覆核王」郭卓堅日前突然宣布將於明年至後年移居英國，因為覺得香港冇民主唔值得留戀。消息一出，佢就立即被網民追數，要求佢交代之前眾籌所得嘅善款數字、用途去向及餘款等。佢尋日就喺社交網站表明唔會公開有關資料，以免被當局取消「高齡生活津貼」，令佢要沿門托缽，行乞過活，仲質疑提出有關要求嘅人別有用心。不過佢強調會將個人生活費與眾籌款項分開。
話怕「生果金」被取消
高齡生活津貼即坊間俗稱嘅「生果金」，只有六十五至六十九歲人士要通過資產及入息審查，七十歲或以上就毋須審查都合資格領取。郭卓堅現年七十三歲，估計佢所指嘅並非生果金，而係不論幾多歲申請都要審查嘅長者生活津貼。
單身人士申領長生津嘅資產上限為卅二萬九千元，郭卓堅擔心公開眾籌數字會令佢喪失有關津貼，莫非佢已籌得超過呢個數？
郭卓堅曾經講過自己做嘅事會自己負責，寧願破產都唔搞眾籌，不過法律援助署限制佢申請法援後就反口發起眾籌，以支付連串司法覆核嘅開支。