歐國盃：葡軍3:2險勝丹麥

葡萄牙首戰輸波，今場打433強攻丹麥，C朗、拿尼當然具級數，但正中鋒普斯迪加把握力卻只屬一般。丹麥451抗衡，前面靠賓特拿攻堅。

C朗頻失機險做罪人

丹麥雖然牌面較曳，但首仗全取三分後信心爆棚，面對葡軍依然壓上進攻，一開波已於右邊連環取得角球，4分鐘門前「波子機」亂撞後，基斯甸艾歷臣門前起腳，好彩葡軍中堅比比飛盡閂走皮球，不然丹麥已先開紀錄。葡軍企穩陣腳後取得較多攻勢，王牌C朗於短時間內兩度埋門，18分鐘禁區外右腳抽射斜出，21分鐘左邊罰球起右腳直射亦高出。但25分鐘葡軍終開紀錄，摩天奴左路開出角球，「飛將軍」比比楔近柱勁頂入網，葡萄牙領先一比○。29分鐘丹麥後場大腳斬前，葡軍中場魯爾梅利斯用手截去皮球，被罰黃牌。

Ｃ朗頻失機，幸葡軍仍贏波。（美聯社圖片）

疤面煞星 油花塊面睇波，已經係指定動作。（GettyImages圖片）

施維斯達華利拿奠勝

34分鐘C朗個人突破搏得罰球，他親自操刀可惜皮球省中人牆越楣而去。36分鐘葡萄牙拉開比數，拿尼右路地波傳中，普斯迪加趕到大腳抽入近柱，領先到2比0。41分鐘，丹麥右路斬中，高恩迪利遠柱頂入中路，賓特拿無人看管下頂入追成較接近紀錄。完半場前C朗門前執雞失敗，半場葡軍僅領先2比1。

換邊後5分鐘，C朗得到單刀機會，但佢太心急起腳，射門角球亦不夠刁鑽，終被對手門將撲出。62分鐘丹麥有個黃金機會，中場基斯特中距離窩利勁射，僅僅柱邊出界。78分鐘，C朗再度有單刀機會，但他面對大個龍門竟然射斜。80分鐘，賓特拿接應右邊出波勁頂入網追成2比2。完場前4分鐘，施維斯達華利拿為葡軍奠勝，驚險地全取三分。

上仗葡軍不敵德國，賽後有傳皇馬教練莫連奴私底下向C朗教路，今仗賽前更於自家FACEBOOK向C朗打氣，但後者依然踢得極曳，「寸王」必定大失所望。