政情：收料站：查「鼎」專委會 建制派霸位

廖長江吳永嘉將加入

建制派尋日就喺例會上討論專委會委員人選，據了解，自由黨堅拒保鼎，表明唔會派人參與專委會。另外民建聯亦考慮避席，但最終都要睇建制派有無足夠嘅人數參與。

調查周浩鼎嘅專委會將喺內務委員會會議上由議員互選，建制派尋日喺例會上討論有關嘅安排。據知，建制為掌握委員會控制權，但唔想畀人批評霸道，決定初步建議七個委員中，五個為建制、兩個為泛民，而五個建制派議員中，三個已經初步落實，分別為身兼建制班長嘅商界廖長江、工業界吳永嘉同埋經民聯石禮謙。工聯會預計會派出一人，若最終無足夠成員，民建聯就會派出一人。

自由黨就堅拒保鼎，表明唔會派人參與專委會。有自由黨中人明言，有咁多人想去，輪都唔輪到自由黨，但其他建制派似乎就對自由黨有微言，覺得自由黨之前已經無參與調查UGL事件嘅專責委員會，今次又表明唔參與係離群。民主派方面則未有討論人選，據知公民黨郭榮鏗會加入專委會。