政情：政黨支持度 熱血公民包尾
本土民主前線發言人梁天琦日前喺英國嘅大學演講指本土派冇市場，而最新調查結果發現，本港主要政團支持度，榜尾四席之中，本土派包攬三席，其中近日內訌浮面致內部錄音流出嘅熱血公民更加敬陪末席，未知係咪與該黨立法會議員鄭松泰大鬧「大眾白癡」有關呢？
教協續居首位
香港研究協會喺今個月二日至十二日，以電話訪問咗約一千名市民，了解佢哋對本港主要政團嘅支持度，結果顯示除咗民建聯維持評分不變外，其餘所有政團評分均錄升幅。以五分為滿分，教協續居首位獲二點七七分；至於榜尾四席之中，分別有香港眾志、香港本土同熱血公民呢三個本土派政團。
其中下跌一位變成包尾嘅熱血公民只得一點九二分，是調查中唯一評分唔夠二分嘅政團。近日熱血公民鬧內訌，其中鄭松泰日前喺內部工作會議嘅一段錄音，就喺今個月十一日流出，內容包括爆粗大鬧青年新政游蕙禎同梁頌恆「佢哋應該死啦」，又話自己要同游、梁二人「扮Friend」，仲大鬧「因為大眾白癡呀嘛」，呢段錄音流出唔知同熱血公民排名包尾係咪有關呢？