中環出更：陳綽琦最叻煮「日式」即食麵

香港菁英會及菁英幗聚聯同香港青年聯會及金紫荊女企業家協會，早前舉辦「幸福煮意細味人生午餐分享會」，菁英幗聚主席林淑怡搵嚟肥媽Maria Cordero做分享嘉賓。見到肥媽梗係諗起煮嘢食，除咗陳綽琦煮日式嘢咁叻之外，菁英會副秘書長顏明秀就笑言自己都算係「地獄廚神」，成日煮燶嘢，但煲湯佢就好拿手，隨口都講得出幾款啱時令的湯水。百仁基金理事陳穎光就透露近期愛上下廚，不過係煮畀阿爸食，早前就試過煮糖醋排骨同冬蟲草畀爸爸。

莊家彬兩招醫肚必殺技

菁英會常務副主席莊家彬都有幾招醫肚必殺技傍身，就係「臘味飯」同「全蛋宴」！佢笑言以前喺外國讀書，每次返港第一時間就係買臘腸，直頭係留學必備，放落飯煲同啲飯一齊煮咁又一餐。另一種萬能食材就係雞蛋，佢話番茄炒蛋同餐肉炒蛋夠晒易整又好食！冬菇則係佢黑名單之一，因為佢整咗幾次都失敗。

顏明秀（左）好拿手煲湯，旁為金紫荊女企業家協會副主席顏麗儀。

林淑怡（右一）與菁英會主席盧金榮（左二）及莊家彬（左一）邀請肥媽Maria Cordero（右二）分享人生經歷。

呢日肥媽除咗分享由細到大嘅經歷同工作心得外，仲大讚籌備活動嘅林淑怡嗰種永不放棄嘅精神同自己生活態度不謀而合，佢話林淑怡打過畀佢好多次，但時間都夾唔啱，但對方仍不斷堅持，所以佢點都要搵個時間出席，仲話呢個係成功嘅秘訣之一。

卓妮