中環出更：助理OT要補水 議員好頭痕
研究近四年嘅標準工時，最終淪為「縮水版合約工時」，只有月薪低於萬一蚊嘅打工仔先受保障，被外界炮轟只有一成六嘅少數打工仔受惠。不過，有關建議或成議員噩耗，皆因議員助理普遍人工低、工時長，落實合約工時後，作為僱主嘅議員勢必要為超時工作（OT）嘅助理提供補水。
工聯會離島區議員鄧家彪喺Facebook上載咗一幅勞工處招聘網頁截圖，留言話「終於搵到乜嘢行業係11k以下……」從圖中見到多份「議員助理」嘅職位空缺，部分標明月薪由一萬蚊起，有啲更只有九千蚊，符合今次建議嘅合約工時所保障嘅僱員資格。圖中嘅「議員助理」未知係立法會議員抑或係區議員，但兩者助理普遍同樣工作時間好長，OT如同家常便飯，相信OT補水金額相當可觀，睇怕各議員都要為此準備。但有網友就喺圖片留言，笑言日後會見到招聘廣告月薪變成一萬一千零一蚊，暗指僱主會藉此逃避合約工時規限，未知作為僱主嘅議員會唔會咁走法律罅呢？
寸陸頌雄 范國威反出醜
另外，新民主同盟嘅范國威亦喺網上抽水，批評身兼行會成員嘅工聯會榮譽會長鄭耀棠有份支持今次合約工時，又指工聯會兩位立法會議員陸頌雄同何啟明就表明反對，諷刺工聯會立場搖擺不定。但范國威所用嘅圖片，就將郭偉強錯認成陸頌雄，其實范、郭二人喺上屆立法會共事咗四年，想唔到范國威離開議事廳唔夠一年，已經唔認得立法會嘅前同事。
卓妮