政情：卡塔爾突變天高偉國險「中招」
最近包括沙特阿拉伯等七個國家突然與卡塔爾斷交，多間航空公司宣布其航班停飛或取消，有關消息一出令好多人措手不及，其中香港表廠商會副會長高偉國（Tim）就差啲「中招」，事關佢原本睇好卡塔爾市場，計劃本月底飛去卡塔爾洽談家族鐘錶品牌進軍當地市場一事，點知中東突然風雲變色。Tim笑稱好彩仲未飛過去，否則返唔到嚟就弊喇！
生意方向朝着內地人
點解睇好卡塔爾市場？Tim話自己做生意鍾意跟住內地人走，內地人興去邊度旅遊，佢就去邊度洽談代理，銷售目標始終以內地人為主。早前內地開通同卡塔爾直航班機，預示將會有愈嚟愈多內地人去旅遊，所以Tim就及早作出部署。
Tim呢個生意策略近年都貫徹始終，好似早幾年內地人興去台灣、日本及韓國玩，佢就去開拓呢幾個市場，後來內地遊客因政治原因唔再去，佢就好有彈性咁退出。依家內地遊客嘅外遊熱點係新加坡、泰國及杜拜，香港亦開始有部分內地客回流，所以Tim就專注喺呢幾個地方做生意，佢笑稱總之跟着大陸嘅旅遊班次去就啱喇！