政情：李世榮少時守龍門 大個仔腰痛
咪睇沙田區議員李世榮身形好大舊就以為佢唔擅長運動，相反佢曾經係一名運動健將，足球、籃球同排球都難佢唔倒。不過積落唔少舊患就喺近期發作，搞到腰痛要去睇跌打囉！
早前見到李世榮一身運動裝束示人，佢透露讀書時曾經係多種球類活動嘅校隊，成績最好嘅係足球，因為佢曾代表所屬大學到內地參加盃賽，最終凱旋而歸添，認真厲害！
練波唔錫身 舊患處處
不過，當年佢係守門員，練波時唔錫身，經常左撲右撲搞到周身傷晒，加上以前恃住後生而無適當治療，結果積落唔少舊患。好彩最近經過治療後有所好轉，仲可以落場打羽毛球，但就要減少跳動喇！
講起黨友張國鈞同葉傲冬落力健身，李世榮都大讚佢哋成績驚人，練到「面都尖埋」，佢更欣賞對方夠毅力，因為佢經常扮演魔鬼引誘佢哋食嘢，但最終都失敗而回囉！