政情：藍王雲仙慘遇車禍 面縫10針
早排我哋喺一個活動上遇到博愛醫院總理藍王雲仙，見佢塊面貼住一塊小小嘅疤痕貼，原來佢上個月遇到交通意外，撞傷咗塊面，仲縫咗十針，醫生話唔想留有疤痕嘅話，就要乖乖地貼住啲疤痕貼，貼到十二月。一個大美人塊面整傷咗，真係見到都心痛。
老公藍國慶睹縫針如椎心
如果大家記得上個月有單交通意外，係一架平治與勞斯萊斯互撼，勞斯萊斯女乘客受傷，有眼利嘅網民睇到之後大呼心痛之餘，亦不忘盛讚女乘客氣質湧晒出嚟，而呢個女乘客就係藍王雲仙喇！話說藍王雲仙曾獲選雪梨華裔小姐冠軍，難怪受傷嘅樣子都吸引到網民注意。早幾日我哋見到佢嘅時候，佢就話受傷之後要食得好清淡，酒、豉油同酸辣嘢都要戒晒，而疤痕貼仲要貼足廿四小時，搞到佢都唔想出街。
講番交通意外當日，藍王雲仙正前往博愛活動中途受傷，佢老公藍國慶就話一收到消息即趕往醫院睇佢，藍國慶仲話睇住老婆縫針嗰時好似每下都拮落自己個心度咁喎！