政情：六合彩開1、3、5、7、9麥美娟以為講笑

早前六合彩開出奇怪「冧把」，七個號碼中有五個為連續嘅最細單數，即一、三、五、七、九，搞到造就大量幸運兒，頭獎每注只派得二百萬港元咁少。立法會議員麥美娟（Alice）就話，早前喺facebook見到唔少朋友討論呢件事，但因為太巧合仲以為講笑添！

Alice話從未買過六合彩，所以無留意相關消息，反而細佬就經常買，仲話中咗頭獎可以養佢添，但當Alice聽到中頭獎都只係分得二百萬元，就大嘆中咗都養佢唔起喇！不過就算唔買六合彩，佢都有幸運數字，而且每四年就會轉一次，因為佢嘅幸運數字係選舉編號囉，所以依家嘅幸運數字就係上年選舉時嘅編號嘞！

佢直言對賭博活動一竅不通，唯一一次賭馬係多年前同大學師兄等人入馬場，竟然誤打誤撞買中咗喎，但佢就話當年連最低消費都唔識，睇嚟嗰次中咗只係撞彩。