政情：吳傑莊帶隊訪馬國 靠西裝打開話題
啲人成日話三年就有一個代溝，再多幾年諗法就更加唔同。近年積極推動青年工作兼與各大機構交流嘅香港青年聯會（青聯）早前就去咗馬來西亞拜訪當地旅遊部官員，了解兩地青年睇法，主席吳傑莊（Johnny）同一班青聯成員仲遇到唔少搞笑事，包括着錯衫。
話說今次佢哋去到馬來西亞出席香港工商青年領袖嘅交流團，Johnny諗住話晒去到人地地頭，兼拜訪高層喎，梗係要着得四正啲啦，所以佢哋成班青聯成員都恭恭敬敬着晒西裝打晒呔。
當地部長只着T恤現身
殊不知佢哋去到嘅時候，竟然見到當地嘅旅遊與文化部長拿督斯里納茲里只係着件黑色短袖Ｔ恤，一身便服現身！原來對方一心就諗住同青年人交流，所以特地唔着西裝，選擇着Ｔ恤輕鬆啲。不過，今次都算係一個美麗嘅誤會，順便為雙方打開話匣子添！
Johnny仲話今次仲參觀咗當地一啲旅遊景點，包括雲頂家族嘅新酒店項目，仲喺一間食肆度見到隻約六點五公斤嘅鎮店大龍蝦，佢同副主席霍啟山及常務副秘書長何迪夫都忍唔住拎住影咗張相。