政情:報道吹捧吳永嘉 波友嚇到縮沙

熱愛打羽毛球嘅立法會議員吳永嘉(Jimmy)出咗名「好打得」,仲曾經係羽毛球青年軍,依家做咗議員,依然都經常打羽毛球。不過,正所謂無敵係最寂寞,Jimmy就呻立法會冇乜議員肯同佢打波,皆因個個見到報道都以為佢好勁,唔敢同佢打,佢仲爆料話金融界議員陳振英(Ronick)本來約過佢打波,但睇到啲報道之後就縮沙話唔打。

立會一「腳」難求

Jimmy依家每星期都會打兩次羽毛球,每次兩、三個鐘,前羽毛球港隊成員陳念慈、實德環球執行董事兼副主席馬浩文都係佢嘅波友。Jimmy原本以為入咗立法會就會有新嘅「羽毛球腳」,點知都係一「腳」難求,個個都唔同佢打。

被爆甩底嘅Ronick就否認臨陣縮沙,只係覺得既然Jimmy球技咁勁,就要搵啲旗鼓相當嘅人同佢對陣。佢就諗住搵銀行界打得之人同佢拍住上,仲講笑話等Jimmy打到後勁不繼佢先上場喎。Ronick又話,佢以前都每星期打波,但因為銀行同事工作愈來愈忙,囝囝又去咗外國讀書,所以冇人陪佢打,先搞到一年打得兩場,球技荒廢晒喇。

第一手消息請下載on.cc東網iPhone/iPad/Android/Windows Phone Apps