政情：承諾捐人工 劉小麗被指走數

網傳憂輸官司 須退回薪金

立法會議員月薪有九萬六千元，一半即係四萬八千元，劉小麗去年就曾經公布將十月份嘅薪金捐去三個社區組織，但係之後至今就無晒消息。網上不時有網民向劉小麗「追數」，又炮轟佢「得個講字」，認為佢唔兌現競選承諾就應交還議席。

近日更有網上消息話，被政府司法覆核議員資格嘅劉小麗，擔心輸官司後須退回所有薪金，所以「冷處理」捐人工一事。

劉小麗接受本報查詢捐人工一事進度時，就只係傳咗兩段網上片段做回應，兩條片分別係佢同社區團體「社區發展陣線」及「女工會」負責人會面。劉小麗在片中特登強調「之前幾個月嘅捐款」、「呢幾個月有啲資源投放喺佢哋度」嚟暗示自己有捐錢，但係片中佢並無交代捐款金額及時間等細節，難以釋除「走數」嫌疑。