中環出更：未來棟樑不識盤中飧 徐伽哀嘆
香港作為國際大都會，糧食方面好依靠入口，難以做到自給自足。社企「雲耕一族」創辦人徐伽（Andrew）提到都巿化所衍生嘅問題，就係本港嘅食物、消費者同種植者之間嘅關係出現斷裂。佢分享有一次同小朋友講解都市農業，同佢哋玩「尋寶遊戲」，而甘筍就係尋寶嘅對象，小朋友完全唔知道目標物就喺泥土入面，仲係第一次見到喺泥土中拔出甘筍啊。
雖則小朋友紛紛露出燦爛嘅笑容，不過Andrew就萌生悲哀嘅感覺。事關呢班小朋友有可能係未來特首、漁農自然護理署署長等，但係佢哋對農產以至食物欠缺基本嘅認識，又點樣制訂落地嘅漁農政策呢？Andrew係修讀建築工程出身，但後來佢了解到自己有份參與嘅發展項目，對自然環境同人類居住方式帶嚟好多改變。亦發現樓宇起得太過密密麻麻，遮天蔽日，反思若然連植物都唔適合生存，又點樣適合人類居住呢？佢鼓勵大眾利用居住空間種植，對身心靈都有益o架。
梁福元孫女花園種番茄
農業的確好需要世代傳承，十八鄉鄉事委員會前主席梁福元（福哥），同佢嘅兒子、元朗前區議員梁明堅同樣喜愛田園生活，經常父子檔一齊落田，對務農嘅熱誠仲感染埋小孫女添啊。孫女年紀細，只係喺屋企花園種植，但都成功種到好甜嘅番茄，福哥都覺得值得鼓勵！雖然疫情下少咗出門，但享受鄉村生活都分外怡情啊。福哥又提到今年雨量均勻、溫差大，提子特別當造。而士多啤梨田亦即將「改頭換面」，會引入大量有機肥水，畀田園吸取營養，休耕生息，待合適時間進行拋秧。
講到有機種植，香港有機資源中心總監黃煥忠教授提到，時下流行嘅有機加工食品，方便大家足不出戶，就可以喺屋企享用健康膳食。大家唔使由朝到晚，不停喺餐廳進食加工食品。黃教授指加工食物往往添加大量防腐劑，會引起敏感，甚至會致癌。至於基因改造食物對身體嘅負面影響，雖仍未有確實證據，但都要盡量避免攝取。另外，黃教授形容經基因改造嘅農作物猶如植物中嘅「霸王」，會變得愈嚟愈頑強，令附近嘅農作物無法生長，影響生物多樣性，威脅自然生態啊。
卓妮