政情：港大擬摺天文學 天文台靠「外援」
早前香港大學理學院嘅天文學及數學/物理學主修課程，傳出因選修學生不足，將於二○一八學年取消主修安排。天文台助理台長黎守德尋日出席中小學科學設計比賽時就大嘆有關安排可惜，認為本地應培育有關人才，否則只能靠聘請「外援」。
黎守德：選科應興趣為先
黎守德舉例，天文台請員工時，如沒有修讀相關科目嘅本地畢業生應徵，惟有向外求才，佢感嘆話：「（近年）似乎有個趨勢，外國收番嚟嘅學生比較多。」
黎守德話，明白本地學生考慮選科時，會從日後就業前景等實際角度出發，但仍寄語學生應以興趣為先，「只要用心追求興趣，最低限度日後搵到份工，都唔止（等）返工放工」。佢又以自己為例，指讀書時「有人話畀我知（修讀）氣象好冷門」，但佢任職嘅天文台正正需要呢方面知識。另外，佢希望能夠多啲同學校合作，加強中小學生嘅科學教育，從小培養佢哋對理科嘅興趣。