新一份《施政報告》決定取消備受爭議嘅綜援「衰仔紙」，政務司司長張建宗尋日出席活動時話，經評估最新情況後，新措施可提早於農曆年初六或七推行，以後為人子女就唔需要再簽署俗稱「衰仔紙」嘅不供養父母證明書。雖然冇咗衰仔紙，但係養唔起父母嘅子女可能仲要繼續做衰仔，事關全民退休保障仍然無影，政府又打算將長者領取綜援年齡由六十歲收緊至六十五歲，張建宗係咪呃阿婆吖？
