中環出更：潘偉業打泰拳 老婆讚有型
近年健康風氣盛行，泰拳就係其中一樣頗受年輕人歡迎嘅運動。香港菁英會體育研究會主席潘偉業（Albert）及香港青年工業家青委主席史昊洺（Kenneth），就跟外號「轟炸機」嘅世界級拳手向柏榮學拳，早前仲約埋幾個老友一齊落場切磋拳技添！
講起泰拳，Albert即刻好醒神，話打拳係一種好強嘅帶氧運動，每次操完都會覺得好精神，個人冇咁易攰，最緊要夠型喎！佢仲自爆，老婆讚過佢打拳時好有型，所以佢就好努力一直學咁話。Kenneth學咗兩年泰拳，最初係為咗強身健體，依家就發現成個人都改變咗，除咗做嘢有毅力，自信心都強咗。
劉燊濤話熱完身都無力
香港工業總會青年委員會主席劉燊濤（Gary）及青委嚴子杰都去趁熱鬧，佢哋兩人嘅師傅係另一位冠軍拳王。Gary話，當初學拳係受到嚴子杰感染，因為見佢身形愈來愈Fit，所以就學埋一份。佢都話打拳可以鍛煉專注力及毅力，上堂頭半個鐘要不斷做體能鍛煉，淨係熱身都榨乾佢精力喎！Gary仲開玩笑話，最想打低Kenneth，因為佢靚仔喎，認真搞笑。
當日除咗幾位男士互相較量之外，向柏榮亦即場示範低掃踢腳把，個個都話真正感受到拳王風範，事關師傅一腳掃埋嚟，佢哋頂住腳把嗰隻腳都即時痹晒，勁度十足。向柏榮就話，學拳要好有恒心咁堅持落去，仲話一百個學拳嘅人之中，都未必有一個可以去打比賽喎！
卓妮