政情：邱騰華做騷轉移臭味

環境局局長邱騰華沉寂多月後，尋日就帶領一班電台節目嘅政壇新秀考察屯門環保園及堆填區做騷，實行軟銷厭惡性設施。邱騰華仲美化今次活動，聲言唔好咁嚴肅用「考察」兩個字，應該係去「生活感受」喎！

如果邱局長認為去堆填區係「生活感受」，咁就試吓搬去堆填區附近居住，長期感受吓，推銷起來可能更有說服力。尋日班政壇新秀落到新界西最大嘅屯門堆填區時，聲言感覺好震撼，無不驚嘆點解可以有咁多垃圾。當然有關方面早已做好事前準備，包括啟動除臭裝置，所以班新秀形容「冇想像中咁臭」，但亦有新秀坦言，大風時都難免聞到陣臭味。

不過，最後新秀們總結時只係話今後要盡量減少製造廢物，以免加重堆填區負荷，但冇要求當局將堆填區選址遠離民居，邱局長今次可算係成功轉移咗堆填區臭味擾民嘅視線。