政情：義助掠水基金 教協遭炮轟
政府早前就喺立法會宣誓時玩嘢同加料嘅四名議員入稟法庭，司法覆核梁國雄（長毛）、劉小麗、姚松炎及羅冠聰嘅議員資格，而佢哋好似打定輸數咁，為免輸官司輸到破產，唔單止申請法援，仲搵埋佔中發起人朱耀明、陳健民，同民主動力創會召集人鄭宇碩，成立「守護公義基金」幫四人籌錢打官司，仲由教協義務設立銀行專戶接收捐款，有團體尋日向教協會長馮偉華發公開信，炮轟教協代設戶口籌款係偷換概念，欺騙市民。
動用龐大資源 與教育無關
呢個基金美其名係透過遊行募捐訟費，實則就騎劫遊行兼巧立名目向市民「掠水」，要公眾為佢哋自己搞出嘅「大頭佛」埋單。有民間團體「拯救學子」亦對呢個「掠水基金」睇唔過眼，尋日向教協會長馮偉華發公開信，批評教協作為教育專業團體，幫呢四個同「教育」風馬牛不相及嘅議員代設籌款戶口籌款係偷換概念，質疑教協以四名議員當中有兩人係大專教師為由，義務幫佢哋籌款做法是顛倒黑白同埋欺騙市民。
公開信又批評教協動用龐大資源去處理相關戶口，加上代管戶口內資金涉及金融、會計工作，與教育專業根本拉唔上任何關係，馮偉華咁樣自把自為就即係將理事會當成自己嘅私人俱樂部，質疑佢哋到底有冇諮詢過會員？仲要求佢哋主動向社會交代相關嘅法律問題。
無交代點用 籌獲不足廿萬
其實拯救學子已經唔係第一次狙擊教協。舊年八月，拯救學子就先後喺金鐘鬧市擺街站，收集簽名譴責教協策劃港大學生衝擊校委會會議，要求佢哋唔好再「思想干預」港大學生，之後更到立法會向同屬教協嘅立法會教育界議員葉建源遞交請願信，希望阻止政治瀰漫校園。
話時話，基金之前開記者會講明會騎劫咗元旦大遊行，迫令民陣同多個民主派政黨乖乖獻上當日所收集到嘅捐款，甚至已收集緊市民嘅捐款，但「朱陳鄭」三人完全唔交代啲錢會點用及批撥嘅守則。唔知係咪因為市民對「守護公義基金」有好多質疑，截至目前都只係籌得唔夠廿萬港元，比起目標五百萬港元仍差一大截。