中環出更：「捱」過金融風暴 嚴玉麟靠堅持
做生意無必勝嘅秘笈，想享受成功果實全靠堅持。電子業商會副會長嚴玉麟（Stanley）創辦嘅時捷集團早前舉行三十五周年酒會，數百名城中名流齊去趁熱鬧。時捷由做電子元件起家，幾個月前仲取得日本電器品牌聲寶（Sharp）嘅港澳獨家代理權，現時每年嘅營業額逾一百億元。不過，Stanley回望創業路並非一帆風順，最難忘九七金融風暴時，集團市值得番幾千萬元，經營好困難，好彩冇諗過放棄。
Stanley嘅太太兼仁濟醫院副主席嚴徐玉珊、大仔嚴子杰、嚴太家姐Betty同弟弟徐志榮家人都有到場，徐志榮係時捷集團旗下一間台灣科技公司總經理，佢外派台灣廿五年，仲娶咗台灣太太添！
千里姻緣一線牽嘅仲有思捷環球主席柯清輝及太太黃麗寧，柯太自爆係菲律賓華僑，當年嚟香港旅行時遇上柯清輝，於是嫁作香港新抱。柯清輝笑笑口話，呢啲叫做「有緣千里來相會」。
與嚴太情同姊妺嘅仁愛堂前主席蔡黃玲玲及丈夫蔡金山都喺度，身兼福建婦女協會主席嘅蔡黃玲玲最近特別關注本港嘅福建籍基層婦女。佢話呢班婦女多數對香港情況了解唔多，希望透過幫佢哋從而對家中青少年產生正面嘅影響，減少時下港青對社會嘅誤解。
吳自豪大讚眼光準
同場嘅電子業商會會長吳自豪就話，近年唔少業界被激烈嘅競爭淘汰，Stanley面對危機時，果斷進行改革，眼光快而準，確係難得。
卓妮