政情：鄉議局大樓 「業」績見紅

鄉紳拒於東鐵宣傳

鄉議局大樓落成初期，帳簿已經滿江紅，四年前試過加租，但係至今仍然冇乜錢賺，加上大樓落成冇幾耐，已經不斷要換呢樣、加嗰樣，包括漏水要換地板、電力裝置唔符合法例規定要執漏、換過晒啲LED慳電膽同加裝閉路電視，每次都涉及五、六位數字。最近仲要向執委會借款近廿萬元大整冷氣添！整嚟整去都未整完，真係愈窮愈見鬼！唔講呢啲使大錢嘅，至少都仲要搵人得閒就抹吓Kenneth爸爸、「新界王」劉皇發嘅銅像，事關銅像不時出現銅綠，真係燈油火蠟都係錢。

鄉議局諗咗唔少計仔去達到收支平衡，例如最近開咗一間新餐廳，算係有啲租金收入。Kenneth話，可能因為大樓地點有啲遠，出租率一直唔理想，其實大樓租金都算幾抵，佢曾經向鄉紳建議，喺東鐵賣廣告，等多啲人知道可以租用大樓，但係就有鄉紳反對，理由係怕啲錢出咗去就收唔番喎！

九月份只賺兩千蚊

Kenneth又話，管理一棟大樓應該成立基金作營運之用，唔明白點解剛起完嘅時候冇撥一筆錢做營運基金，未來會同鄉紳討論可以點樣搞。咁樣聽落，即係又要撥一筆錢去做，相信為數都唔少，但係大樓九月份都只係賺得兩千蚊，根本就冇乜錢賺，睇嚟要得到鄉紳嘅支持亦都唔容易呀！