有傳中央已向財政司司長曾俊華（鬍鬚曾）亮起「紅燈」，即唔鼓勵佢辭職參選特首。鬍鬚曾尋日出席電台節目時聲稱呢啲都係謠言，佢會當作娛樂新聞咁睇。節目主持話佢打咗條綠色呔，係咪意味佢會「自己開綠燈」、即使中央反對都「衝燈」參選？鬍鬚曾繼續扭扭擰擰，自己仍在積極考慮中，「不停咁諗」。
鬍鬚曾又話，有朋友指依家社會撕裂、施政困難，所以鼓勵佢參選，但亦有人提醒佢參選特首會畀人抹黑，家人亦會受騷擾。佢自言會「一日一日做人」，強調參選與否並非關乎個人榮辱，而係對港人長遠利益係咪有利喎。
對於政務司司長林鄭月娥日前質疑，香港經濟近年增長唔及新加坡，疑似批評掌管香港財金政策多年嘅鬍鬚曾。鬍鬚曾辯稱新加坡可以大幅度填海同大量輸入外勞，攞嚟同香港比較係不切實際同不可思議。對於佢任內嘅預算案年年估錯數，佢又歸咎因為香港係外向型經濟，所以難以估算盈餘。但如果施政困難、增長放緩、庫房水浸，全部都同鬍鬚曾無關，咁過去幾年佢究竟喺政府裏面做緊乜呢？
已宣布參選特首嘅前法官胡國興，就質疑鬍鬚曾「還在等什麼？」批評對方畏首畏尾、猶豫不決。食物及衞生局局長高永文亦話，身為現任政府嘅一名主要官員，根本就唔應該公開評論任何有關參選特首嘅問題，疑似暗批鬍鬚曾一方面唔肯辭職、另一方面又搞搞震影響軍心。